ТРАНСПАРЕНТНИ СЛИКИ

Дали веќе сте слушнале за новиот скандинавски тренд? Транспарентно врамување - или две стакла прицврстени со една рамка. Малку поинаков начин како да ги разубавите вашите ѕидови со врамени слики, но овој пат тие да немаат позадина, ниту пак паспарту.  

Она што ќе го врамите помеѓу двете стакла може да е цртеж, фотографија, но на нас многу интересна ни се виде идејата тоа да бидат лисја од некое растение. Како прекрасна илустрација од ботаничка книга, само што сега тие ќе бидат вистински, а вие ќе бидете горди што сами тоа сте го направиле.

Сигурно се прашувате зошто тоа да не биде нормална рамка со позадина. Транспарентното врамување ќе ви даде поголема креативна слобода да го "заробите" елементот внатре, креирајќи илузија дека тој лебди, помеѓу се останато.

Во зависност од типот на просторот или од вашата желба, изборот на лисјата може да биде различен, од исушени зелени лисја од растенија кои може да ги најдете во вашиот двор, до тревки или гранка од семиња кои ќе ги наберете по патот на некое патување или викенд на село.

Пченица, лаванда, ориз или мајчина душичка се само некој од многуте предлози кои би можеле убаво да изгледаат.

Транспарентните слики ќе се вклопат во простории со различна намена, во зависност од вашите идеи. Може да ги групирате со други врамени слики, да ги потпрете на вашата работна маса или на подот покрај креветот.